پایگاه خبری تحلیلی سلام پاوه: هەواڵیوی کتوپڕ،جەرگبڕ و هەزار کەڕەتێ دڵ ئێشن مامۆسا جەمیل ئەحمەدی ئۆسا دیواری هێقموو یانەو گۆرانیێ هەورامیێ، نەوسوودٚەو ئاواتە بەرزەکاشەنە پەی هەتاهەتای دنیاو حەسرەتە ئەوەنەبڕیاکاش ئاستش جیا و پێسنە پەلەوەریوی بێ نازی باڵێش گێرتێوە پەی حەوت ئاسمانەو هۆنەری.

پەی خەڵکوو هەورامانی،پەی گۆرانیەواچاو هەورامانی و پەی کۆمەڵگای هۆنەری کوردٚەسانی هەواڵیوی ناوەش و قۆرس بێ.نەواچیا دیارا هەر نەتەوێو حەنەرێوش هەن تایبەو وێشا و مەلیڤیۆ پەی کۆماڵێوەتەرێ پاسنە هەرمانێوەش بۆ مەر لاسایێش کەرۆوە،حەنەروو وەڵاتە پەڕ ڕەمز و ڕازەکاو هەورامانیچ هەوازە سەربەرزەکەو سیاوچەمانەن.

سیاوچەمانە نزانی هۆنەروو وەڵاتیویا کە میدیانە بە گردٚوو سەخڵەتیا و وەربەس و وەرپەنگاشەوە ژیوان و پاڵوو لاوک و حەیران و هۆرە ی،لاپاڵوو زاگرۆسوو سۆڵاوەکاشاوە قۆڵێ ئێنسانی و هۆنەریش کەردٚێنێنە قۆڵێ یەکترینی تا ژیوای هامبەششا ئامێتێو بۆ جە هۆنەری و جوانخاسی و جوانخاس ڤینای هۆنەرمەنداش.یەکەم چێوێو شۆنۆ ئەژنەویای نامێو هەورامانی مەینە ویروو وەردەنگی سیاوچەمانە و وردٚەبەزمێ ئۆسا دەنگ وەشەکاشا،ئا مامۆسا چنەزانێ و حاڵ زانێ کە هەردٚ و کەش و کۆ وەڵاتیشا پنە لاڤنانەوە و خەم و خەفەتشا دان گۆشێ نیشتمانیەرە.

یۆ چا مامۆسا دەنگ وەشاو هۆنەروو گۆرانیێ هەورامانیە کە ساڵانیوی هۆنەری بریقەدارش ویاراره مامۆسا جەمیل ئەحمەدی ئەژناسیا بە جەمیل نەوسودٚی بێ.
ساڵانێو لیکموو شانازی و شابازی.
ساڵانێو هۆرگیروو پاشەکەوتێو بە بارەسای شاهۆی شاهۆبەی.
ساڵانێو زانایی بە گازرەو تەمەنێو ئاواتێ گا نامای
ساڵانێو پەڕ جە شارەزایی و شاکاری.
ساڵانێو تێکەڵوو حەزیوی بەرزی و هەوازێوی غەیبی جە ئاسمانوو پیرەکاو هەورامانی.
جەمیلوو چەپڵەڕێزانوو شادٚیەکا
جەمیلوو وردٚەبەزمە ئاهوورایەکا.
جەمیلێو ماواو حەوزەلارەینە چەمێش دنیاشا دی.ماواو ئەلیلەی و مامۆ کامیلی و پایەبەرزەکاو نەوسودٚێ و شۆشمێ.

جەمیلێو بە هەوازەی حەنەریش کۆگاو سیاوچەمانەیش هەتیم نەوست و نەما لوسێ تا هەتیمی و مەینەتوو نیشتمانێو پەڕاوپەڕوو ئاواتە بەرزا نەڤینۆ.مەلۆ ویرمەنە هەورامی بۆ و هەورامانەنە ژیوا بۆ و بە دەنگوو ئادٚی سەرمەس جە گەورەییش خولێوە دەسەملانوو وەشیێوی بێ حەننا نەبیەبۆ.بێ هیچ شکێوە جەمیلێوتەر ئەدٚا مەڤینۆشەوە و ئینەنە وەرێژ پەی ئێمەمانا کە مزانمێ ئادٚ وەش مەبۆوە و یاگێش هەرگیزاوهەرگیز پەڕە مەبۆوە و….
داخێوە کە بەرەکۆ خەمەوەرا و دڵسۆچناو هۆنەروو هەورامانی وەر مەدٚۆ ئانێنە کە چی مشیۆم هۆنەرمەندێش و گەورەپیاکێش ئەوپەڕوو کەساسی و ئەوەنەپرسایەنە دنیای بازا جیا و هیچکەس لاشا نەکەرۆوە لا!!،ئادٚیچ چی ئاژێنە کە شۆنۆ ئادٚیشارە خەریکا هەروەرەنە و وارەبەوارە سیاوچەمانە دلێنە مشەی مشۆ چوونکەتی ئێتر کەس نیا بە شارەزایی ئادٚیشا ئا تەشک گۆرانیێ واچۆوە.

ئای ئای ئای….نە ئاکادێمیڤ نریارە پەی فێر کەردٚەی و بار ئاردٚەی حەزپنەکەراو گۆرانیێ هەورامیێ،تا زەمانێو ئا ئاڵتوونێ مەنێنێ چنەشا کەڵک هۆرگێرمێ.مامۆسا جەمیل لوا،هەرچن دەنگش هەتاهەتان مەنۆوە بەڵام شارەزاییش چنی هەزاران ئاخێش واشیشا کەردٚە خاکوو پیرۆزوو نیشینگەو ژیرلارە بێ ئانەیە ئا تۆشەبەرۆ زانایە کۆڵێشەوە گێرمێرە!!.

بێ ئانەیە پەرسمێش چنە هۆنەروو وەڵاتی چێشش قەرەتا و کەلەبەرەکاش گێرمێ و باروومش هەرۆڵ نازمێ!!.ئیسە کە مامۆسا جەمیلی نازاری و دەنگ نازاری ئاستیمێ جیا با وەڵێ ئانەینە جەمیلێوتەر بێ دەنگیێوی جەمیل ئاسایەنە!،بازۆماوە چنی هەمماروو مێراقوو نەبیەیش، با هاگاما هۆنەرمەندەکاما بۆ،گۆش دەیمێ داڵغە و دڵەچرکەکاشا،گۆش دارمێنە قسەکاشا و بزانمێ ئادٚێ پا گردٚوو تەجرۆباوە چێش ماچا پەی ترۆق و ئەوەتەنای هۆنەروو هەورامانی.

فیلسووفیوی گەورە ماچۆ: پەی ئەژناسای پیایوی لەیدٚەی تەماشەو شناسنامەکەیش کەرا و پەی ئەژناسای هەر نەتەوێویچ چەمێ بڕانە زانا و نویسەر و هۆنەرمەنداش.ئایا ئێمە پێسنە هەورامیا چەمێما بڕیێنێنە زانا و نویسەر و هۆنەرمەندەکاما؟!.ئایا بیەی نامێو مامۆسا جەمیل و هۆنەرمەندەکاو هەورامانی خەزێنێوی گەورە نیا پەی وەڵاتی؟؟.

دەی با هاگاما گەورەکاما بۆ و تا زەمانێو ئینای ژیواینە و پاڵمانە هەناسەو مێراقا هۆرکێشا بلمێ پێوایشاوە،ئێحتێرامشا گێرمێ،جە کەلوپەلەکەیشا مووزه وەش کەرمێ،مووزێو ئاستوو بەرزی ئادٚیشانە بۆ تا وەڵات بە نامێ گەورێ ئادٚیشاوە نامێش کۆرە نەبۆوە.هەرمانە هۆنەریەکاشا هۆرگێرمێ و پارێزنمێشا.

ئەگەر نەوارێوی دەمیشا هەنما دەیمێش دەسوو لایەنگیرە هەرەقەتیناو هۆنەروو هەورامانی تا بە پارێزەوە وەڵاش کەراوە تا هەم جە فەوتیای رۆزگارێشا کەرمێ هەمیچ قەبارەو هۆنەریما بەرزتەر کەرمێ.مامۆسا گیان ئارام و ئەهوەن بووسە،سپاس پەی تەمەنیوی چنی تۆ ڤیارامارە و ونەگۆشێ چریکەی حەنەریت بێنمێ.یادٚت هەرمان