پایگاه خبری تحلیلی سلام پاوه: مەتی مینا ژەنیه قابلیەتدارە و ماقووڵه بێ.تاتەش قەدٚیم به خاترەو دەسەڵاتداری یانەو کێخا حوسەینی، مەتی میناش به زۆر دایبێ به مەجیدٚیشا. مەجیدٚ پیایه تووڕە و ناوچاو تاڵ بێ، به منێو هەنگوینەو نەوریێ.گەلاوێژەی کناچێشا تازه پنه یاوایبێ و ژیوایشەنە شارش نەدٚیەبێ و هەمیشه لاو ئەدٚایشەو خەریکەو کار و هەرمانوو یانە و مڵکی بێ.مەتی مینا تووشوو ناکۆکی ئاما و ڕۆ به ڕۆ بێ‌هازه کەوته و ئەرکوو کار و هەرمانوو ئا یانەیه کەوت سەروو شانەو گەلاوێژێ.

مەجیدٚ گۆش نەدٚێ بە مەتی مینای، تا خەڵکوو دەگای مەنعەشا کەرد و بەردەش دوکتور. شۆنەو عەکس و ئازمایشەکاره کاشی بەعەمەڵ ئاما و سەرەتانوو مەعدەیش هەن، دوکتوری واتەبێ دێر ئامایندێ و مشیۆم حەتمەن چل شەوێ بیمارستان بۆ.مەجیدٚ تاقەتوو بیمارستانیش پەی دوێ سەعاتا نەبێ، چە بیاوۆ چل شەوێ.

ناچار گەلاوێژەی فەقیره کە تەماموو عەمریشەنە شارش نەدٚیەبێ لوا چنی ئەدٚایش.چا شارە غەریوەنه ناهومێدٚ دوو بە دوو وێشان تەنیا بیمارستانەنە بێنێ، هامدەمشا هەم‌تەختیو ئەدٚایش بێ، ژەنیە بێ شووکەش ساحیو کارخانه و دەسەڵاتدار بێ.کوڕەکەشا ڕۆیه یەرێ چوار جارێ سەر دێوە ئەدٚایش. ئاننەش پەو نەشی کوڕ به بەهانێ دەوا و ەرمانی و کەل و پەلی نزیکوو گەلاوێژێ بیەو و کەین و بەینش چنی بەسە.

ئاخر ڕۆ دەوا و دەرمانوو ئەدٚایش، قەوڵش دا دەسش گێرۆ، قەوڵوو ژیوایە وەش و ئاسایشوو دلێ شاریش پەنه دا.گەلاوێژەی بەسه‌زوانه تا وەڵێ ئانەیەنه بلۆ پەی شاری چنی هیچ کوڕێوی قسێش نەکردێبێنێ و گۆڵوو قساو کوڕیش وارد و کوڕه گۆشیش پەی ئەسا.ئامایوه پەی دەگای، کەین و بەینشا جه قسە و باسی ترازیا و عەکسێ وێش تێکەڵ تێکەڵ کیانی پەی کوڕەی و کوڕەیچ رۆ به رۆ دڵنیایش کەرێ مەی هیجویش.

مەتی مینا وەرگەو ناوەشیش نەگێرت و عەمرەو خودٚایش کەرده، کوڕەیچ قەوڵش دابێ بە گەلاوێژێ فەقیری، هەرچی عەکسێ گەلاوێژێ بێنێ وەڵایش کەردێوە و گەلاوێژە تەبێعەتوو تاتەیش و قەزاوەتوو خەڵکوو دەگاکێش زانێ، وێش سۆچنا و مەرده.مەجیدٚیچ هەم ژەنیش جه دەس دا و هەم کناچێش

داخۆم خەتاو کامی بیێبۆ؟ خەتاو مەجیدٚی بێ خانەگمان و تننە تەبێعەت بێ و ناسش گەلاوێژە سەرە بەربارۆ و دنیای بژناسۆ تا زوو گۆڵوو کەسی نوەرۆ، یا بەدٚشانسی مەتی مینای بێ تووشوو نەوەشی بیه و مەجبووره بیه بلۆ پەی دوکتوری شاری غەریوەنە.یا خەتاو ئانەیەنه هەڵای شعوور و زانایی ئێستفادٚە کەردەی جە گۆشیما نیا….