وصف فعالان رسانه پاوه از زبان مدیر عامل موسسه فرهنگی هنری نسیم فرهنگ هورامان
پایگاه خبری تحلیلی سلام پاوه : ابراهیم شمس مدیر عامل موسسه فرهنگی هنری نسیم فرهنگ هورامان در مراسم تجلیل از خبرنگاران به مناسبت روز خبرنگار در ۱۷ مرداد ماه ۱۳۹۸ سخنرانی زیبایی داشتند که به مناسبت روز خبرنگار درخواست بازنشر این سخنان با زبان شیرین هورامی را دارند. به نامێو خودٚای گه‌وره‌ی سڵام. ته‌ماموو شمه […]
- ۱۷ مرداد ۱۳۹۹
- کد خبر 91436
- بدون دیدگاه
پایگاه خبری تحلیلی سلام پاوه : ابراهیم شمس مدیر عامل موسسه فرهنگی هنری نسیم فرهنگ هورامان در مراسم تجلیل از خبرنگاران به مناسبت روز خبرنگار در ۱۷ مرداد ماه ۱۳۹۸ سخنرانی زیبایی داشتند که به مناسبت روز خبرنگار درخواست بازنشر این سخنان با زبان شیرین هورامی را دارند.
به نامێو خودٚای گه‌وره‌ی
سڵام.
ته‌ماموو شمه ئازیزا جه مامۆسایانی ئاینی تا مودیرانی ده‌وڵه‌تی و ساحیبانوو قه‌ڵه‌م و ئه‌ندیشه‌ی و ئه‌سحابوو ڕه‌سانه‌ی گردٚێتا حورمه‌تتا هه‌ن و ئیجازه فه‌رماودێ با نامێو که‌سی نه‌به‌روو. یا خودٚا گردٚێتا خێر به‌یدێ سه‌روو گیانی و سه‌روو چه‌ماما.
ئارۆ فره وه‌شحاڵه‌نا و شانازی که‌روو که چێگه‌نه گلێرێ بیێنمێوه تاحورمه‌ت گێرمێ جه تاقمێوی که هیچوه‌خت به حه‌قوو وێش نه‌یاوان. تاقمێو که پنه‌شا ماچا ڕۆکنوو چوارۆموو دێمۆکراسی.
به‌ڵێ تاقمه‌و خه‌به‌رنگارا. خه‌به‌رنگار که‌سێوه‌ن که په‌یجۆروو گیر و گرفتاو کۆمه‌ڵگایه‌ن و جه گێڵایشه‌نه واقێعه‌تێ تاڵێ مێزۆوه و ئه‌وه‌جه‌کاو کۆمه‌ڵگای ده‌رک که‌رۆ. په‌ی نیشان دای و وه‌ڵا که‌ردٚه‌و ئی ئه‌وه‌جا، وێش به مه‌سئوول مزانۆ. خه‌به‌رنگار ڕابێتوو به‌ینوو مه‌ردم و مه‌سئوولان و ئێتر نمه‌تاوۆ بێ خیاڵ بۆ و جه ئاکامه‌نه به قه‌ڵه‌مه‌که‌یش ملۆ جه‌نگوو که‌م و که‌سریه‌کا و بێ خیاڵیه‌کا و جه ئی ڕانه بڕێو وه‌ختێ تووشوو گێچه‌ڵا و هه‌ڕه‌شا و دژمانا مه‌ی به‌ڵام هیچوه‌خت ده‌س جه کار و ڕه‌ساله‌توو وێش نمه‌کێشۆ .
ئازیزا! ئێمه پێسه‌و بنکه‌و نه‌سیموو فه‌رهه‌نگوو هه‌ورامانی به عه‌زمێوی پۆڵاین ئاماینمێنه مه‌یدٚانوو خزمه‌تی فه‌رهه‌نگی و جه ئی ۵ ساڵه‌نه که جه عه‌مروو نه‌سیموو هه‌ورامانی ویه‌رۆ، کارێ گه‌ورێ کریاینێ. ئی به‌رنامه ۲۵ۆمین به‌رنامه‌ن که جه لاو شنه‌و (نسیم)فه‌رهه‌نگوو هه‌ورامانیه‌و جه شاروو پاوه‌یه‌نه ملۆ ڕاوه. ئێمه په‌ی هه‌ر به‌رنامێوی لانیکه‌م یه‌ک مانگ و بڕێو پێسه‌و هه‌مایێش و جه‌شنواره ته‌خه‌سۆسیه‌کا فره‌ته‌ر جه دوێ مانگێ سه‌رشاوه کار که‌رمێ و ته‌رح و گراڵه‌شا په‌ی مجمێ و ده‌بیرخانه و کارگروو وه‌ش که‌رمێ و جه نه‌هایه‌توو ئه‌مری یه‌ک ڕۆنه مه‌راسمه‌که‌ی گێرمێ و ئێتر کاروو ئێمه ته‌مام. به‌ڵام کاری ئه‌رزشی ئینا لاو ڕه‌سانه‌کاوه.
سایته ئازیزه‌کێو شاره‌که‌یما که به ئاو و تاو ئی به‌رناما ئێنعکاس مدٚا و زه‌حمه‌ته‌کاو ئێمه منویسا مارا سه‌روو سه‌فحه‌و ئینترنتی و په‌ی دایمه‌ده‌ره‌ی کاره‌که‌و ئێمه ماندگار که‌را.
ئێمه ئامه‌ینمێ تا چێگه‌نه به به‌هانه‌و ڕۆ خه‌به‌رنگاری جه زه‌حمه‌توو ئی ئازیزا قه‌دٚر و حورمه‌ت گێرمێ .
با من مه‌تڵه‌به‌که‌یم نه‌ختێو ئێحساسی که‌روو چوون چه‌نی گردٚوو ئی ڕه‌سانا هه‌ر جه ئه‌وه‌ڵوو کاره‌که‌یشاوه بیه‌نا.
کومه‌کاڵ یاسر خالدی زاد ئه‌وه‌ڵین سایتی فه‌رهه‌نگی، کۆمه‌ڵایه‌تی و خه‌به‌ی شاروو پاوه‌ی جه ساڵه‌کاو ۱۳۸۷ی به ئی لا فه‌عالیه‌توو وێش ده‌س پنه که‌ردٚ ڕه‌نگا یۆ جه ئه‌وه‌ڵین که‌سا که جه نیه‌توو یاسری په‌ی ئه‌ره‌نیای کۆمه‌کاڵی خه‌به‌رش بیه‌بۆ، من بوو چوون ئێمه ڕابێته‌ی نزیکی دۆسانه‌ما بێ جه ئه‌وه‌ڵین که‌سا بێنمێ که جه پاوه‌نه پێوه‌ره کاروو وبلاگ نویسی که‌رێنمێ.
کۆمەکاڵ پێسەو ئەوەڵین سایتی بی به مەرکەز و ئەرمانگاو نویسەرا و قەڵەم بەدەساو ئی شاریە و مەقالە نویساو گردوو هەورامانی. بێ تەعارف ماچوو کە کۆمکاڵ خەلەئوو نەبیەی گۆڤار و رۆنامەیش پەی یه‌رێ چوار ساڵا پەڕ کەردەبێوە و بەڵام چالشێ فرێش تووش ئامای و جە ئاخرەو ڕوێو دیما نویسابێ کۆمەکاڵ پەی هەمیشەی بینیا. هەر چن کۆمەکاڵ ساڵێوا هەمتەر و بە جۆرێوتەر ئامانەنە گەورەتەڵانەو عەرسەو خەبەری.
کۆمەکاڵ لوا بەڵام ئی چراوێ نەکوشیاوە و سەلام پاوە و پاوە پرێس و هەزارماسووڵە و دەنگی نوریاو بە قودرەت ئامەینە عەرسەو خەبەری و بە جۆرئەت متاڤوو واچوو پەی پەنج شش ساڵان جە ئۆستانەو کرماشانی و جە غەربوو کشوەری قسێ ئەوەڵی کەرا.
یاوه‌ر ئێزکات جوانی مه‌حجووب و با ئه‌خلاق جه سایتوو هه‌زار ماسووڵه‌ی به ئه‌ره نیای هه‌واڵه جۆراجۆره فه‌رهه‌نگی، سیاسی، کۆمه‌ڵایه‌تی و خه‌به‌ری پا به پاو ئه‌و سایه‌تکاته‌ری خزمه‌تی گه‌وره‌ش به وڵاته‌که‌یش که‌ردٚه‌نش و ئیسه‌یچ هه‌ر به‌رقه‌رارا. شوجاعه‌ت و شه‌هامه‌تێو که جه ڕۆشنگه‌ریه‌نه جه یاوه‌ری دیه‌نم فره که‌م وێنه‌ن. یو جه تایبه‌تمه‌ندیاو هه‌زار ماسووله‌ی بیه‌ی خاتوونێوه‌ی خه‌به‌رنگارنه. خاتوو که‌وسه‌ر فه‌خری که به ڕاسی یاگێو شانازیه‌نه.
کاکە فارۆقی نازەنین مامۆساو قەڵەمی. نەسیموو فەرهەنگوو هەورامانی تا دنیا دنیان مەمنوون و مەدیۆنوو دەس و قەڵەمیتا.
قەیدش نیا با ئی گلەیێچە کەروو فه‌قه‌ت فره گولالێ!! جه وه‌ختێوه‌نه بڕێو که ئێحترامی فره‌ما هه‌ن په‌یشا دلێ لیسته به‌رزه‌که‌یشاوه نامێو نه‌سیمی پێسه‌و بنکێوی فه‌رهه‌نگی شاروو پاوه‌ی نمه‌نویسا،، کاکە فارۆق بە دڵی گەورەیش و بە قەڵەمی بێ وێنەش جه پاوه پرێسه‌نه عەزەمەتوو کاروو نەسیمی بە دنیای نیشانە مدٚۆ. ئینە یانێو ڕەسالەتوو خەبەرنگاری. من که‌ڕه‌تێوشا په‌ی کاری په‌یجۆری وێم گه‌ره‌کم بێ سه‌رتیتروو ئا وتارا که جه پاوه پرێسه‌نه مونته‌شرێ بیێنێ بنویسووشا. جه ته‌وانمه‌نه نه‌بێ. ده‌ی چن دانێ بنویسوو پانسه‌دٚ؟ هه‌زار ؟ دوێ هه‌زارێ؟ به ڕاسی ئینه شاکاروو سایته‌کاو ئێمه و خبه‌رنگاره زه‌حمه‌تکێشه‌کاو ئێمه‌ن. کاکه فارۆق زندگی وێش سه‌روو ئی کاریه وست خه‌ته‌ر. ساڵه‌و پاری بێ که قه‌لبش مدرا گیر و په‌ی چن مانگا ته‌حت نه‌زه‌ر بێ و ڕه‌ساله‌توو پاوه پرێسی به ده‌سه هونه‌رمه‌نده‌کاو کوڕی نازاریش کاکه میلاد یۆسفی درێژه‌ش پنه دریا . کاکه میلاد گیان خه‌به‌رنگاری نازه‌نین ده‌سوو تۆیچ وه‌ش بۆ.
سلام پاوە فەرهادی وەشەویس و سۆهەیبی نازەنین.
من مشیۆ چی سەرەو ئێحترامی نەنامنوەرە پەی ئی دوە جوانەیە کە بە یاگێ ئانەی بلا شۆنەو ژیوای وێشارە، ساڵەهان شەو و ڕۆشا نیان دەموو یۆیەو عەرسەشا پەی که‌م کارا تەنگ کەردەنەو. ڕەنگا من نزیکتەرین کەس بیەبوو پەی فەهادی وەختێو کە ئی سایتشە نیارە. هیچوەخت ویرم مەشۆوە وەختێو گەرەکش بێ سەلام پاوەی کەرۆ سایت ئاما جە من مەشوەرەتش گێرت ماچۆ حاجی تۆ ئەخلاقوو من مژناسی گەرەکما چیروو پەڕچەمەو نزامیەنە بلوو جەنگوو ناعەداڵەتی واتم فەرهاد پیاوه‌تیت بۆ لوە شۆنەو زندەگیتەرە ئی کارە مەسئوولیەتێش فرێنێ تۆ جە زندگی وزۆوە دما ئینه نان و ئاوش نیا چنه. هەر پاسەیچە بی. فەرهاد شوجاعانە پڕانە مەیدان. نەقدوو ڕیز و درۆشتی و گه‌وره و گولاله‌یش که‌ردٚ. نەقدوو مودیرا، نه‌قدوو گردی و حه‌تتا نه‌قدوو منیچش کەرد. ئارۆ ئەگەر جە زێندەگی کەوتەنەو دما، بەڵام ژیوایش سەربەرزانەن. فه‌رهاد گیان سوهه‌یب گیان بێ قه‌زای بیدێ.
کاکە موزەفەر وەڵەدبەگی مودیروو سایتوو دەنگوو نووریاوی و کاناڵەو ئەمواتی.
مزانوو فرەفرە شەکەتەنی مزانوو ئەڵبەت خاسا واچوو گردما مزانمێ ساڵەهان یەک ڕۆ بە وێت ئیسراحەتت نەدٚان و گەورەتەرین ئارشیوی خەبەری و فەرهه‌نگیت جە مەنتەقەنە گلێر کەردەنەو گردما مزانمێ ساڵەهان سەدها موساحێبێت چنی کەسانێوی کەردەن کە گەنجینێ بیێنێ و ناسەنت دماو مەرگیشا گەنجینەو قساشا بەرا چیروو خاکی.
من هیزی جارێوته‌ر ژیونامه‌که‌ت جه سایته‌که‌ته‌نه وانامه‌و نامێو ئا که‌سا که موساحێبه‌ت چنی گێرتێ بێنێ نویسێبێنێت. که‌س باوه‌ڕ نمه‌که‌رۆ که تۆ چنی فره‌ته‌ر جه هه‌زار نه‌فه‌را موساحێبه‌ت که‌ردٚه‌ن و ئارشیوت ئێننه‌و کتێبخانێوی مه‌رکه‌زی گه‌وره‌ن. مزانمێ ئەمواتت وەش کەرد تا زەحمەتوو خەڵکی پەی پەرسەی کەم کەریەوە.
مزەفەر گیان ئه‌گه‌ر بڕێو قه‌دٚرت نمه‌زانا و دڵت مێشنا، ئینەی بزانە دڵ ماڕای ڕەسموو رۆزگاریا و ئانێ چەموو دیەو ئا گرد خزمەتوو تۆشا نیا. بەڵام ئێمە گردما قەدروو زەحمەتاو تۆ مزانمێ و تا ئەبەد مەمنوونێتەنمێ.
چێگه‌نه یاگێش هه‌نه جه جنابوو ئاغای زامیادی خه‌به‌رنگاری ڕه‌سمی که ساڵها هه‌واڵێو مه‌نته‌قه‌یش جه ده‌نگ وڕه‌نگه‌نه وه‌ڵای که‌ردٚێوه و ئیسه شوکروو خودٚای پێسه‌و به‌خشداروو باینگانی خزمه‌ت به مه‌ردموو ئا مه‌نته‌قه‌یه نه‌سیبش بیه‌ن، ته‌شه‌کور و قه‌دردانی که‌روو. به تایبه‌ت جه کاکه که‌یهانی موحه‌ممه‌دی جه سایتوو سه‌لام پاوه‌ی که ئارۆ زه‌حمه‌توو فیلمبه‌رداری ئینا سه‌روو شاناشه‌و. ئێحترامم هه‌ن په‌ی ئه‌سحابوو خه‌به‌ری و ڕه‌سانه‌ی مامۆسا مومن نووری هامکاری ئازیزما که ساڵه‌ها ڕادیۆ مه‌ریوانه‌نه بیه‌ن.
سپاس په‌ی ئا دۆسه ئازیزا که به وتاره‌کاشا هامکارێ سایته‌کا بیێنێ و به ده‌عوه‌توو ئێمه له‌به‌یکشا وات و ته‌شریفشا ئاورد.
سپاس په‌ی جه‌نابوو دوکتر هه‌دایه‌ت مه‌حموودی ڕه‌ئیسوو ئێرشادی که به دڵی گه‌وره‌یش ئیجازه‌ش دان ئێمه کارێ گه‌ورێ که‌رمێ.
ئێرادتم هه‌ن خزمه‌توو خانه‌واده‌و نه‌سیمی که‌سانێو که بێ ته‌وه‌قۆع جه وه‌ختیشا و جه قه‌ڵه‌میشا و جه باخه‌ڵیشا په‌ی هه‌ورامانی خه‌رج که‌را به تایبه‌ت په‌ی ئی به‌رنامه‌یه جه مامۆسا موحه‌ممه‌د خالێد قانێع، ماموسا مۆمن نووری، کاکه فه‌تحوڵڵا نه‌جه‌فی وکاکه فایێق لوتفی ، پێسه‌و پیشکسوه‌تا و گه‌وراو نه‌سیمێ، و کاکه سه‌یێد ئازاد حوسه‌ینی پوشتیوانی هه‌میشه‌یی نه‌سیمی و که‌یوان موساعێد مودیروو به‌رنامه‌کاو نه‌سیمی، خاتوو گۆنا ڕاپیما ستوونه‌و نه‌سیمی و موجری ئی به‌رنامه‌یه، ئێراده‌تم هه‌ن خزمه‌توو گردوو ئه‌نداماو نه‌سیمی و ده‌سوو گردٚی ماچ که‌روو.
سپاس په‌ی شاعێره ئازیزه‌کا و گۆره‌نیه واچه‌کا، سپاس په‌ی ئه‌سحابوو ڕه‌سانه‌ی که ئارۆ ئینایمێ خزمه‌تشانه.
و جه ئاخره‌و سپاسو وێم و ئه‌نداماو نه‌سیموو فه‌رهه‌نگوو هه‌ورامانی ئاراسته‌و زه‌حمه‌ته‌کاو ئه‌نجوه‌نوو ژیوای که‌رمێ. هیچ زوانێو نمه‌تاوۆ به‌یانوو ئا جه وێ ویه‌ردٚه‌یه و ئا کاره گه‌وره‌یشا که‌رۆ. ئادٚێ به ڕاسی دلێ دڵوو خه‌ڵکیه‌نه گه‌ورێنێ و خوای گه‌وره فره‌ته‌ر پایه‌شا به‌رزته‌ر که‌رۆوه و جه هه‌رچی به‌ڵایان پارێزنۆشا.
سپاس په‌ی گردیتا، هه‌ورامان ئاوه‌دٚان.
