پایگاه خبری تحلیلی سلام پاوه : کیسەکەش فرە چێوەش چەنە بێ بەڵام کۆڵێ قۆرس شەکەش ئێ شانەشەنە، ئیلاو ئەولاش پەنە کەرێ، دەنگوو وەشیو خوەو زاڕۆڵا گۆشێ زەرەنگنێ، دلێ ئاوێنەو پاڵوو وانگاکەینە( مەدرەسە) وێش ئەستەوە سەرتاپاش دیار بێ، ئەداش ئێشەو تا نیمەشەو سەرو مانتۆکەیشەوە تووتێ ڕەمە ڕەمالێشا کەردەبێ تا نەختێ جە خەتێ کۆنێش لا بشا، بەڵام پەڕوو کۆڵەپشتیەکێ مازیش خەفەت دلەشەنە کۆڵش بەستەبێ، جە حەر چی کۆلی بێ قۆرستەرە بێ.

کۆڵەپشتیەکەش وەستە زەمین تا سەرو کەڵاسێ شۆنیشەرە کێشیای کێشیا!ئێسالیچ کەسێ سەرو کەڵاسیۆنەشناسێ پێسە گرد ساڵێ ساحیب یانەی گردو کەلوپەلەکەیشا وەستەبێش دلێ بەرەو یانەکەی تاتەش حەر بە کۆڵێ گردو ئەسبابەکەیش پەی یانەوەتەری کێش کەردە بێ.

سەرو کەلاسیەوە حەر چی ملە بێنێ شەکە شەک چەرخیەوە پەێش،سەرەش وەستەرە وێش فڕەدا ئاخریین سەندەڵیەو کەلاسەکێ، جێڕەو سەندەڵیەکێ دلێ چپەچپوو زاڕۆڵەکانە گۆم بی، حەرچی خەفت بێ لێوەو خەفەتو ڕۆ ئەوەڵوو وانگای لێوە، یەرەمانگێ پشوو وانگای خەفەتوو ئەوەڵ ڕۆی وەرێ ، مامۆسا( مۆعەلێم) وانگای دلێ بەرەنە زەیاوە خوەوە زل دلێ لچاشەنە وەشەکانە کەرێ،حەیوەتیەنە دلێ سەندەڵیەکەنە قووجیانە بیانێ کۆلێوە خەنجیلانە، مقنەکەش پێسە تۆشەبەرێوە داش ملوو چڕوچەمیشەرە، دەنگو گڤڤەی ئاما مامۆساکێ پێسە تووڵێوە سەرو سەرەیشەوە شۆکیای شۆکیەوە واتش: مسیارەی تازێنی؟ مقنەکە سەرو سەرەیشەوە مجیارە، سەرەش نامنارە، نامێت چێشا؟ گڵوەزێوەش قووت دا نامێم … نامێێێم…. شیلانەنە… مامۆسا: زاڕۆڵا نامێش شیلانەمە…. شیلان گیان ئادەی واچە تاتەت پێشەش چێشا؟ چیکارەن؟ قەلبش مدرا…. واچێشی تاتەش مەردەن…. تاتەم… تاتەم… باررررر یۆ جە زاڕۆڵەکا ماچۆ: باربەریش ھەن؟ گرد داشا چێروو خوای…. سەرەش شۆکناوە … تاتەم … تتتاتتە ممم ال سی دی …. مامۆسا ئەھا دوکانو اڵ سی دیش ھەن باز ھەم سەرەش شۆکناوە…. نا تتتاتتتەممم گارتون …. چی حاڵەنە چەمە زەلەکاش پەڕە بیەبەنە ھەڵسی … تتاتتەمم کۆڵبەرا….