پایگاه خبری تحلیلی سلام پاوه: نووکەچەنێو قازانج،هەمارێو وەرێژ و وژیوگەگێڵی دەوا پەی سارێژوو زامی:نەواچیا دیارا تەوەن بنەڕەتوو یانەو ژیوەنی هەر کۆمەڵگایێوی ئابووری و گلێرەوە کەردٚەی ماڵ و سامانیشا،بەواتێوتەر هەر نەتەوێو و کۆمەڵگایێو گەرەکش بۆ یاگەپاو وێش چی دنیا پان و پۆڕەنە هێقم کەرۆ و لێژی نەفەوتیای بە وێشەوە نەڤینۆ مشیۆم وەڵێ گردٚ چێویەنە دەسەڵاتی وەرپەرسش ژیوەنی و وەش ویارای خەڵکەکەیش وەش کەرۆ تا بتاڤۆ کۆگایوی حەز پنە کەردٚە مەرزنۆرە،ئیجا بەداخەوە کوردٚەسان بە گردٚی و هەورامان تایبە چوونکەتی چا قسێ سەریە بێ پشکێ و بێ بەشێنێ هەرمانەکێشا وەروو ئەنقەسی ئەوەنەپارسای و بێ مەلاباتی فرە سەخڵەتەنە، مشیۆم بە تەشک ودیامانیوی وێ واز، خەڵکەکە و سەرینی ئادٚیشاوە پێڕێوە ژیرێ و گەشاوەزێ بنیشارە و بە ئەرکیوی پیرۆزی نەتەوەیی دەس دا هەرمانەکێوە و بە ئەرەمەرزنای گلێرگاکا و تاقمە خەڵکیەکا وەرپەرسی چننێ بەشا گێرا سەروو شاناشا.

وەڵاتوو ئێمە بەپاو ئانەیە وەڵاتیوی دماکەوتە و بێ پەردٚۆچ جە ویەروو کار و هەرمانیا جە ڕێسکێو ڕێژەو بێکاری ئی پەڕ و ئەوپەڕوو ئێرانیەنە یەکەما و فرەتەرین ئاماروو بێکاریش هەن.ئینە یانێو ئێش و ئێش یانێو ئینە!!!.ئێش یانێو نەبیەی نان و خوانی و ئاوارە بیەی ئی مەحاڵ و ئەو مەحاڵی پەی تیکێو نانێ!.

ئێش یانێو بێ تەگبیری و وێت کەری بە تەگبیرکەر.نە کارخانێو و کارگایێو پەی هەرمان کەردٚەی نە کەشتوکاڵیوی وەڵکەوتە و ژیرانە نە چودٚاری و ئاژەڵداریوی مکانیزە پەی گوزەرانیوی حەز پنە کەردٚەی هەر وەروو نەبیەی ئی بنەڕاییتەرین ئەوەجێ ئێنسانیێ،خەڵکەکە حەیبەتیێ کۆچ و بار پێچۆوە و ئاوارەو شارەکاتەری بۆ.

ئاماروو کۆچ کەردٚەی و چۆڵ بیەی شار و دێهاتەکاو هەورامانی یاوان فەڵەک و پی تەشکە بلۆ وەرەوە بۆ بە گێچەڵێوە قووڵێ قەرەبوو نەکریای.وەشبەختانە ئینە پەی چن ساڵیوی ملۆ هەورامان پێسەو مەحاڵیوی تایبەتی گێڵیاری جە ئێرانەنە ئەژناسیان و تۆماری جەهانیچ سەرەوە بۆ بیەن بە یۆ جە کۆگا گێڵیاریە مەکین و وەرچەم وەسێعەکاو ئێرانی،ئینە بیەن نوونگەو ئانەیە خەڵکەکە هەر یۆ یاگۆ وێشەنە پەی کەڵک گێرتەی چی پەردٚۆچیە چۆڵێ هەرمانا هۆرکەرۆ و بە ئەوەکەردٚەی یانە و ئیجارە دای کۆنجوو باخەکاشا فارس واتەنی ئاب باریکێو پەی وێش وەش کەرۆ بەڵام پەرسێ ئینەی چێگەنە:ئەرکوو کۆگا خەڵکیەکا شۆنۆ ئەرەمەرزیایشا چێشا؟

ئایا پیس و پۆخڵی ژیوگەو هەورامانی پێسەو فاکتۆریوی بنەڕەتی پەی سەردای گێڵیارەکا قەرەبوو کریۆوە؟

ئایا دماڕۆنە پەی ترۆقی یەکجاری و وەش کەردٚەی چێرخانیوی دایمەی ئینە مەبۆ ڕێک و خاس پەساریۆوە؟

بە پاو هازە و ئاوەزیما جوابوو پەرسەکاو سەری مدٚەیمێوە.بە باوەروو ئی خامەیە مشیۆم زمنەو یاگە گێڵیاریەکاتەری کەرمێ بە چۆڵەچراڤۆ دماڕۆیما تا نەگنمێنە ئا چاڵێ کە ئادٚێ ماوێوا دلێشەنە قاچێ فڕنا!!.سەرنیشتوو ئێرانی خاستەرین نموونەن پەی ئی زمنەیە،عەینوو ئێمە، سەرنیشت ئەژناسیا بە ئێرانیەکا،هەروەرەنە ڕوەشا کەردٚەنە و خەڵکەکە پێسەو ئیسەو ئێمە دەسش کەردٚ یانەوە کەردٚەی و…

ئاکامش پیسی،ترافیک،شێویای دێمۆگرافی مەحاڵەکەی،تێک دریای فەرهەنگی، سەرونەشیویایی کۆمەڵایەتی،ئەسنیای زەمین و زار و یانە و دووکانیشا و ئاخرسەر کۆچ و بار کەردٚەی عەسڵەکا و یاگیر بیەی لەیدٚەکا و ئانە کە ئیسە وینمێش!!!.سەرنیشت چی پاسەشە سەرئاما؟چوونکەتی ڕاچارێوی گردٚلایەنشا نەیۆستەوە پەی ئەوەپەسارنای و ونارای هەرمانەکێ.

ئیجا سەرنیشتێو کە متاڤی واچی گردٚوو کەلوپەلەکانە جە هەورامانی سەرتەرا پاسشە سەرئامان وەی پەی حاڵوو هەورامانی بەسەزوانی!.وەڵێ گردٚچێویەنە:ئەرەنیای ئەنجۆمەنێوی خەڵکی کە جە گردٚوو دێهاتەکاو هەورامانیەوە نوێنەرش چنە بۆ تا پەی چار کەردٚەی گێچەڵە قووڵەکا زووتەرین وەختەنە بەیوە دەسێ و وەرپەرسانە چاروو نەوەشیەکا کەرۆ،پەی نموونەی دێهاتانێو پێسە هەجیج،سلێنە،بڵبەر یام شارانیوی گولالە پێسە نۆدشەی کەی دلێ وێشانە و ئا شەقامە تەسک و تەنگەلایانە متاڤا ئاننە ماشینێ ڕا کەراوە؟،سەرەئێشەی،مەزاج تێک شیەی هەورامیەکا،شەڕ بەرەک گێرتەی و……،هەر ئیسەوە پارکینگ مشیۆم یەکەم لاقۆرەو ئێمەی هەورامی بۆ و جە بەروو دێهاتەکاوە سەرمایەدارەکێ جیاتی ئەوەکەردٚەی هۆتێلا،پارکینگ وەش کەرا تا بنەڕەتیتەرین گێچەڵەما چار کریۆ.

یۆتەر جە ئەرکە کاریگەرەکاو ئی ئەنجۆمەنیە مشیۆم ئەرەنیای کەلاسێ فێرکاریێ بە ڕاوەبەری گەشاوەزەکا و دەروون ئەژناسەکا بۆ پەی فێر کەردٚەی خەڵکەکەی و وەرگە گێرتەی ئی شەپۆلێ و ئەوەنەتاویای فەرهەنگی و خدٚێ نەدٚای بە فەرهەنگە بەرینیەکا.

مشیۆم ئەرکوو ئی فێرکارا  ئانە بۆ خەڵکی بیاڤنانە، فەرهەنگێ جیاکارێ تایبەتمەندی دنیاو ئارۆیەنێ و ئێمەی هەورامی تا ئا یاگێ لیڤیۆ فەرهەنگی بەرزما دەیمێ نیشانوو مێمانەکاما و هاگاما چنە بۆ دلێ فەرهەنگانیوی دیمەن وەش پنەکەوتەینە ئاسیمیلێ نەبیمێ!!.یۆتەر جە ئەرکەکاو ئی ئەنجۆمەنیە مشیۆم بەردٚە سەروو ڕادەو وەرگە گێرتەی ئێمەی هەورامی بۆ تا وەختوو دەمەتەقەکانە وەروو وێما گێرمێ و جە قۆمیای کارە ناشیرینەکا وەرگیری کریۆ.

تایبەتمەندی کۆمەڵگاو ئێمە تەنیا دیمەنی ئاهوورایی و بەهەشتیشا و هیچێوتەر و ئەرکوو ئێمە و پرزێ دماڕۆی هەورامانی پارێزنایا و پارێزنای ئیجا چەنی؟

بە وەرچەم گێرتەی زانستی،ئیسە ئێتر تووریسم یاگێو وێش داینەش بە ئێکۆتووریسم یام ژیوگەگێڵی،چی جۆر گێڵایەنە هەم گێڵیار و هەم ساحیب یانە کەمتەرین وەرێژ مدٚا ئەو ژیوگەی،ساحیب یانە ئێتر ویلا و هۆتێلێ مۆدێڕنە وەشە مەکەرۆ،بە شێوازوو مێعماری وێش یانە کەرۆوە یانێو هەورامانەنە جە دار و تەوەنێ و دیمەکی کەڵک گیریۆ و فرەیچ وەشا،دماچەوە ساحیب یانە ماچۆ بە مێمانەکا چیوی پیسکەر نارا چنی وێشا بەڵکووم چێگەنە پەیشا ڕێک ڤزا.گێڵیاریچ مەی ژیوگەنە گێڵۆ،پیسش مەکەرۆ،هاگاش فەرهەنگوو یاگەکێ هەن،هاگاش ئێژانە کۆمەڵایەتیەکاش هەن،تا ئا یاگێ پنەش کریۆ تاخایت پێسنە خەڵکەکەیچ موەرۆ،مووسۆ و پۆشۆ.پی بارسەو شێونای ژیوگەو هەورامانیە تاقانە ڕاچارەو هەورامانی یاگێ وستەی ژیوگەگێڵیا تا وەروو ئی شیویایە گیریۆ و دماڕۆیچەنە نازمێ چینەیە فرەتەر دار و درەخت و ژیوگەو هەورامانی بە دەسوو گێڵیارەکا تێک دریۆ.

جە دماڕۆچەنە بەباوەروو ئی خامەیە مشیۆم گردٚوو هەرمانە تاکیەکا بلانە چێروو چەمدٚاری کۆگایوی خەڵکی و سەمەنەکا تا پەی نموونەی کەسێو گەرەکشا یانێو کەرۆوە بە وەرەچەم گێرتەی ئا مەرجە ژیوگەپارێزنایا، فەرهەنگی و کۆمەڵایەتیا کە ئا کۆگای ماچاش پنە،کەرۆشەوە تا وەرێژ ڕۆبەڕۆ کەمتەر بۆوە،یام ئەگەر گێچەڵێوە ئاما وەرەڕاش بلۆ چاگە تەگبیرش کەرا.ئاواتەوازەنا بە وەرچەم گێرتەی ئی خاڵا هەورامانەنە پەی دماڕۆیوی گەش و گەشتەر لاقۆرە فاڕمێوە.