ناپەی نەژنەویای لایەلایەو ئەۮای/ئۆمید حەبیبی قالب وردپرسدانلود رایگان قالب وردپرسپوسته خبری ایرانیقالب مجله خبریطراحی سایتپوسته وردپرسکلکسیون طراحی
شما اینجا هستید
اخبار » ناپەی نەژنەویای لایەلایەو ئەۮای/ئۆمید حەبیبی

پایگاه خبری تحلیلی سلام پاوه:حەشاش چنە مەکریۆ ئەوەوڵکیای و ئەرەشیویای تان وپۆ کۆمەڵگاییوی چا بەرەگانە قۆمیۆ خەڵکەکەش تخوونوو فەرهەنگی وێمانەیشا نەگناوە و خۮێ دانە فەرهەنگیوی لەیۮەی و دلێشەنە تاویاوە،چا تەشک و دیامانەنە تاک وێش نیا و بێ وێن،ناهاگاویرش لیکموو هۆرزەوئەرەنیشتیوی درۆزنیا و نەپێکانش چکۆوە ئامان و گەرکشا کۆگەوە بلۆ.کۆمەڵگاچ جە پێوەزوو تاکەکا و پێوەرە ژیوایشا وەش بۆ و وەختارێو تاکەکێ سەرشا ڤنە شیویا بۆ چەنی کۆمەڵگا ترۆق کەرۆ؟!،چەنی بارەسەی زانشتیش میاڤۆ چڵەپۆپەو وێش؟!.

ئەر ویەرۮەو بەشەری لەیەک دەیمێوە و ئێژانەوکێشانەش کەرمێ گنۆوە سارا پەیما ئا وەڵاتێ کە وەڵێ شۆڕش چنی داگیرکەروو وەڵاتەکەیشا دانشا گژێ ویری پووچەڵوو وێشاورە،ئیسە سەرکەوتە بیەیشا کلکەنیشان کریۆ بەڵام چەپەوانەو ئا جۆر وەڵاتا بڕێو یاگێچما هەنێ فەرهەنگشا بە تۆرەکە بریان و کەرۮەنشا کارەیو تەوەن بنەڕەتوو فەرهەنگیشا کە زوانا ویرشانە نەمەنەن و دلێ قەمچەکاو ویەرینیەنە پێوارشا کەرۮەن.نەواچیا دیارا زوان جیاکار جە ئەرکوو پێوەنی بنیاۮمەکا ئامیانوو گلێرەوە کەرۮەی فۆلکلۆر،ئەدەبیات و ماباقی چێوەکاشا،ئا داگیرکەرێچە زوەوە پی قسێ زانانشا و تەپشا کوا بۆ سەروو هەر مەحاڵیوی وەڵێ گرۮ چێویەنە هڕووموو کۆڵەکۆ فەرهەنگوو وەڵاتەکەیشا کە زوانا دان.

عەرەبێ ئێرانشا گێرتەرە واتشا زوانوو ئێمە زوانوو قۆرعانیا و فرە وەشەویسا،پیتدار و قازانجدارا بەڵام زوانوو شمە سەقەتا و زوان پسکێندێ،پا شێوە زوانی پارسیشا قەرەت کەرۮ کە ئیسەیچە پی گرۮوو دەسەڵاتی سیاسی و کۆمەڵایەتیشەوە هەڵای چێرەخەروو زوانی عەرەبیا.چا زەمانەنە فرەو خەڵکی تایبە بەنامێ ڕۆشنویرەکێچشا کەوتێنە وا گێجئاوێ و خەریک بێ پەی هەتاهەتای شۆنەماو زوانی پارسی نەمەنۆ،ئەر زانایی و گەشاوەزی فێردەوسی نەبیایا ڕەنگا فارسەکێچ بیەیانێوە مێسریەکێ و ئیسە ئاژە چێوێوتەر بێ

و یاگۆ شانازی بیەیا پەی خامەبەدەسەکاشا نامێشا عەرەبیە بۆ و بە عەرەبی نویستەکاشا بنویسا(هەرچن بڕێوشا ئیسەیچە چامنێنێ!!).یامکەتی وەختارێو داگیرکەرە وەرنیشتیەکێ داشا ملوو ساراو ئافریقایەرە بە فێڵێ زوانشا فاڕا و کەرۮشا بە فەڕانسەوی،ئێسپانیۆلی و ئینگلیسی وجپەی هەمیشەی زوانە وێمانەکێشا کەرۮێ چێروو خاکیەورە،ئافریقاچ بی پا کۆما وەڵاتە دماکەوتا کە جە نەبیەی تەنانەت نانەوشکێنە خەریکوو تاسیایەنێ.کورۮەسانوو وێچمانە کەسانێو پێسە ئاتاتۆرکی بە بنەچەق بێ حیا و سەددامی گۆڕبەگۆڕ شۆنۆ ئا نەوع داگیرکاریەوە بێنێ و ئیسەیچە پرزەکێشا خەریکوو هەرمابەکێنێ.

بە وەشحاڵیەوە کۆمەڵگای جەهانی و بڕێو جە ویژدانە ئینسانیە ژووژەڵەکا شۆنۆ وێنیشانداکەو وانیاراو شاروو داکای پایتەختوو هەریموو بەنگالی کە ئاوەخت سەر بە پاکستانی بێ جە ساڵۆ ۱۹۵۲زایینیەنە دژ بە خزمەتوو دەسەڵاتی بە زوانوو ئۆردووی و قەۮەخە کەرۮەی وانای و نویستەی بە زوانوو ئاۮیشا، تەقەو پۆلیسی و کۆشیای بڕێو چا وانیارا وەراوەر بە هەمیەتوو زوانی ئەۮایی زیت بیەنەوە و بە هارەقەرە متەی ئاۮیشا جە ساڵۆ ۱۹۹۹زایینیەوە ڕێکڤزیاو یۆنسکۆی ڕۆ دوو مانگۆ سیاوکاموو گرۮ ساڵێوێش بە نامۆ ڕۆ جەهانی زوانی ئەۮایی دیاری کەرۮ و ساڵۆ ۲۰۰۸یچش بە ساڵۆ جەهانی زوانی نامێ نیا،چا وەختانە تا ئیسە ڕۆشنویرە وێپاکێ جە سەرانسەروو دنیای پەی ئەژناسای حەقوو وانای و نویستەی تاکەکا بە زوانی ئەۮایی وێشا دەسەڵاتە ملهۆڕەکا گژیای گژیا.

زوانی هەورامیچ کە شۆنۆ مەرگوو قەڵاو ئەدەبیاتەکەیش مامۆسا مەولەوی کەوتەبێنە سەراوچێری دلێنە شیەی و گێڵۆوە بڕێو خەمەوەرا کە چیلاوچەولاوە پەی نەفەوتیایش قۆڵێ هەرماناشا هۆرکەرۮێبێنێ کەس لا نەکەرێوە لاش،یۆ چا زوانا بێ یۆنسکۆی وات ئینا چێروو خەتێ سووروو نەمەنەیشەنە.بەداخەوە زوانی هەورامی حەقوو وانای و نویستەی جە وانگانە و هەرپاسە هەرمان کەرۮەی پنەش جە میدیاکانە نەۮریانش پنە و تا ئیسە کە خەریکوو نویستەی ئی وتاریەنا چا بەشانە زەیچەو هەورامیش چنەن پەرۮۆچش پنە نەۮریان تا وێش جە لافاڤوو نەمەنەی بڕنۆرە و بەشێو جە میراتوو بەشەری پێسە فرەو زوانە کەم هازەکاو دنیای ژەنگۆ فەوتیای نەوەرۆشەرە و عەینوو فرەو حەقە ئینسانیەکا جە وەرهۆرزەنە ئی حەقە بنەڕەتیەیچە کریان چێروو لچاوە!!

بە پەیلواو فرەو گەشاوەزەکاو دەروونشناسی زاڕۆڵێو بە زوانوو ئەۮاو وێش نەوانۆ و نەنویسۆ و جە وانگانە فێروو زوانێوتەری کریۆ مەژگش تێک مشۆ و هازیش پەی فێر بیەی زوانێوتەری جە دەس مۮۆ و تا ئا ساتە ئینا دنیانە هەستوو هەرەقەتینوو وێش نیاش و وێش بە کەم مزانۆ.کەسێو بە زوانوو ئەۮاو وێش نەنویسۆ و ئانە ئینا ویرشەنە وەڵاش نەکەرۆوە مەتاڤۆ چا ویەرەنە سەرکەوتە بۆ پەی سەلەمنای قسەکێ کریۆ واچی تا ئیسە هیچ نویسەر و هۆنیارێو جە دنیاو ئەدەبیاتیەنە نەبیەن کە بە زوانێو بێژگە زوانی ئـەۮاییش بەرهەمێوش نویستە بۆ و ئێننە یاگۆ سەرەنجی بیەبۆ کە خەڵاتێو پێسە نۆبێل یش بەرۮە بۆ.هەمیەتوو زوانی ئەۮایی جە وەرنیشتەنە کەوتەنەوە سارا و هەر وەڵاتیوی گێری چننها وانگای زوانیێش چنەنێ و بە فرەو زوانەکاش هەرمانە کریۆ تەنانەت ئا یاسا ئینسانیە یاوان بڕێو وەڵاتاو وەرهۆرزی پێسە هێندووستانی و حقووقی زوانی چاگەنە بریۆ ڕاوە.

بەداخێوێ گرانەوە زوانی هەورامی تا ئیسە چا قساو سەریە بێ بەش بیەن بەڵام مشۆم قسەکەرەکێش پەی قەرەبوو کەرۮەی ئی کەلەبەر و نۆقسانیەیە خاستەر وێشا مارننا و بلا شۆنیەرە تا وەڵێنە زوانەکە و دماتەر فەرهەنگە بریقەدارەکەشا دلێنە نەشۆ،

ئیسە کە پەرۮۆچوو ئانەیە نیا فێرگا بە زوانی هەورامی بۆ وێما بلمێ شۆنیەرە،فێرێ نویستەی و ئەوەوانای زوانە شیرینەکەیما بیمێ و دماتەر هەریۆما بۆ بە فێرکارێو پەی بنەواناش و دلێ یانەینە واڵێ،براڵە،ئەۮا،تاتە و زاڕۆڵە و….فێرێ کەرمێ تا پی جۆرە زوانەکەیما جە نەمەنەی ڕزگار کەرمێ.چێویوی ئەوەنەشاریان زوان هینوو ئەۮایا،ئەۮانە زاڕۆڵەی پەروەرنۆ و زاڕۆڵەن کە ڕابەروو دماڕۆ وەڵاتیا.ئەۮانە زاڕۆڵەی میاڤنۆنە ئا ئەرکە قۆرسەیە کە وەراوەر بە پارێزنای زوانی ئەۮایی وێش هەنش بەتایبەت چی وەڵاتوو ئێمەنە کە هەمیەتوو زوانی ئەۮایی نەکەوتەنەوە سارا پەی کۆمەڵگای بەپاو ئا قسێ فرەتەر جە گرۮیما ئینە ئەرکوو خاتوونەکاو هەورامانیا دەس دا هەرمانەوە.

تەنیا نویسەرێ و هۆنیارێ نیەنێ کە ئەرکوو سەروو شاناشانا بەرهەمەکاشا بە هەورامی بیاونا دەسوو کۆمەڵگای،ماباقی خەڵکیچ متاوا یاگۆ وێشانە خزمەت کەرا بە زوانەکەیشا پەی نموونەی نامە،ئیمەیل و….بە هەورامی کیانا پەی هەنگەری،کابرای دووکاندار تابڵۆ سەروو دووکانەکەیش بە هەورامی بنویسۆ،فێرکار جە فێرگانە پاڵوو وانە واتەی بە زوانەکاتەری مسیارەکا بیاڤنۆنە زوانوو ئێمەیچ ئینەنە و هەورامیش ماچا.فەرزتەر جە گرۮی کە مشۆم گرۮ هەورامی زوانێو پەی خزمەت بە زوانە کەم دەسەڵاتەکەیش کەرۆ بەرز گێرتەی ڕۆ دوو مانگۆ سیاوکاموو گرۮ ساڵێوێ ڕۆ جەهانی زوانی ئەۮایا تا بەشکەم بۆ بە نەریتێو و تاکێ هەورامانی بزانا هەمیەتوو زوانەکەیشا زیاتەر چانەینە مزانا و بیەی و نەبیەی ئاۮیشا بە بیەی ئاۮیشا بەننا.

بەڕاسی تافلێر خاسش پێکابێ جە قەڕنۆ ویسیەنە واچێ قەڕنۆ ویس ویەکی قەڕنۆ کەمینە زوانی و قەومیەکان.بە دەس پنە کەرۮەی یاونەرە کۆمەڵایەتیەکا پێسە فەیس بووک،تلێگرام،ئینستاگرام و توویتێر فرەو تەلبەنە باوەکا کە جە لاو بڕێو زۆرداراوە پەی قەتیسنای هام نەوعەکاشا وەشێ بیێبێنێ قرتیاینێ و گرۮ کەس متاڤۆ هەم حەز و ئاواتەکاش چا یاونەرانە درکنۆ هەمیچ بە وەش کەرۮەی تاقمەکا ویروو وێشا تۆمار کەرا

و بیاوناش دنیایەرە.زوانی هەورامی متاڤۆ چی پەرۮۆچیە خاستەرین کەڵک و قازانج هۆرگێرۆ.ئا نویسەر و هۆنیارە کە دنیای هەرەقەتینەنە بە نوونگەو وەربەس وەش کەرۮەی مەلیڤیۆشا پەی بەرهەمەکاشا کەرا بە کتێب یام خەرجوو ئەرەنیای کاناڵیوی ماهوارەیی پەیشا قۆرسا متاوا هاڵیگای مەجازیەنە بەر و بەرهەمەکاشا وەڵا کەراوە تا زیاۮەو تۆمار بیەیشا پەی هەمیشەی و کۆمەڵگای زوانیچشا وەراوەر بە خەتەروو دلێنە شیەی زوانەکەیشا زیت کەراوە تا بەشکەم زاڕۆڵە چەم نەخشینەکێ هەورامانی جە بەرەکەتوو زوانی ئەۮایی وێشا بێ بەشێ نەکریا و هەوازەو لایەلایەو ئەۮایشا نیشینگەو ئاهوورایەنە زریکەش بەی.

جە دماینەنە ئاواتەوازەنا دنیا بە یاوەری ویرێ ئینسانیێ وێپای و دەسباری ئا ویربەرزاوە کە بێ وەرەچەم گێرتەی قازانجێ گولالێ سیاسیێ و کۆمەڵایەتیێ پەی یاوگیوی ئینسانی بەرزی کە هیچ زوانێو،نەتەوێو و ڕەگەزێو نەبۆ نوونگەو ئەوەقەتیسنای و سەرنگم کەرۮەی ئەو زوان و نەتەوەکا هەنگامە بنیۆ.

کانال تلگرام سایت خبری سلام پاوه

  1. راویار

    دوو سیاوکامی (اسفند)ڕۆ جێهانی زوانی ٸەد٘ایی

    ” زوانی ئەڐایی ”

    خامەی خەمینم سیاو خاڵەکەم
    دەوای شەو نشین ناڵە ناڵەکەم

    یاوەری دەرم ڕۆحی ڕەوانم
    تۆ وستاوه ویر بەرزی زوانم

    زوانوو ئەڐای هەورامی واچم
    جەور و ستەم کێش بێگانه پاچم

    زوانی شیرین ، وەڵاتی وەش ڕەنگ
    مشۆ هەر مەنۆ نەختینه فەرهەنگ

    کناچێ ، کوڕێ ، جوانێ ، پیرێ
    ویەردەو وێشا کەراوە ویرێ

    حاشاو ڕەسەنی جە عەقڵی دوورا
    زوانوو ئەڐای فەرز و زەروورا

    بێ ئاوەز بە دەم بڕۆ بنچینه
    کێ کەرۆ ئەو وێش زڵمی ئەچینه؟

    گیانیم دەوروو زوانیم تەنوو
    هەتا قیامەت هەورامی مەنوو

    مەکتەبی گەورە یاگۆ ئاوەزی
    گەوهەرا مجیۆ سەروو کاغەزی

    تا هەناو هەنم هەناسەو مەنەی
    مەکێشوو دەس جە هەورامی وەنەی

    #یاسر_ڕەشیدی

  2. هورامان زمین

    بۆنەو ڕۆ زوانی ئەد٘اییوە

    سوبحان ئەمینی
    ۱ ؍ ۱۲ ؍ ۱۳۹۶ ک.ڕ

    ئا ڕوە کە خود٘ا دنیاش بنەڕەت مەرزنارە، دنیا بیە مەید٘انوو هۆملکان و مامێز و پەلاماری پەی دەواموو ژیوای. بە واتێوەتەر یەک پارچە بیە مەید٘انوو هەل و هەڕەشەی (فرصت، تهدید).
    ئانێ کە وریا و ژیرێ بێنێ و تاواشا وێشا چەنی فاڕ و گۆڕوو ڕۆزگار گونجنا و مەلەوانی پیەن ئاوە ئاڵۆزەکاو ژیوای کەرا، دنیا یەک پارچە بیە هەلە و دەرەتان پەیشا و بە مراد٘وو دڵیشا یاوێ؛ بەڵام ئانێ کە گۆشوو گاوینە وتێ و بێ خەم پاڵشا داوە، بیێ پێسە تەختەو سەروو ئاوێ و گێجاواو ڕۆزگاری دلێ وێشەنە نقمەسارێ کەرد٘ێ و ئیسە کەس شۆنەمایشا مەزانۆ!!
    ئیسە مشۆم ئینەی خاستەر بزانمێ، ئارۆ ئی شەپۆلێ بێ ڕەحمانەتەر و ئاڵۆزتەر و خێراتەر جە گرد٘ زەمانێ، ئەمان جە ئەمانداری بڕا و ئەگەر یەک سات غافڵ و بێ خەم بنیشیرە پاسە مازیت ماڕا کە هەتا هەتان نەیوە سەروو وێت!!
    سا ئارۆ دنیا پەی گرد٘ کەسی مەید٘انوو هەل و هەڕەشەینە و ئەگەر هاگاد٘ار و وریا نەبی تووشوو چارەنویسوو ئا مللەتا بی کە تارێخی دلێ پەراوێزیشەنە شارتێوە!!
    هەرپاسە کە مزاندێ هەر مللەتێ بە بڕێ چێوێ تایبەتێوە مشناسیۆ و جە ماباقی مللەتەکا جیا بۆوە. پێسە: جۆغرافیا، جل و بەرگ، زوان، دین، دەسکار، مێعماری، هونەر، ڕەسم و ڕسوومات و …
    بە بڕواو فرەو زانایا دلێ ئینیشانە “زوان” تەوەنەو بنەڕەتوو ئی گەورە عەمارەتینە و ئەگەر تەوەنەو بنەڕەتی هەرۆڵە یا نوقسانە بۆ، بێ شک گەورە عەمارەت وڕۆرە و ئەگەر بە سەد٘ ڕەنگێ و بە سەد٘ جۆرێ کەریشۆ؛ ئێتر مەبۆوە ئا عەمارەتوو چاوەڵیە؛ پەوچی واتەنشا:
    “ئەگەر گەرەکت بۆ مللەتێ فەوتنی و دلێنە بەریش، مشۆم ئەوەڵ پەلامارەو زوانەکەیش دەی!!”
    جا وەختێ مللەتێ بە زوان دلێنە بشۆ و فەوتیۆ، چی مشۆم گرد٘وو هێز و تواناکاش نەوزۆ هەرمانە پەی پارێزنای و ترۆقیش؟ ئایا تا ئیسە کەستا دیەن بلۆ پێوای مەرگیوە؟
    بێ شک نا.
    ……….
    بەڵام داخەی گرانەم!! ئینە ماوێ چند٘ە ساڵەن زوانی هەورامی گرۆڵیەش کەوتێنە لێژی و ڕواس و چەقەڵی سەرە کەرد٘ەنەنە و هەر ڕوێ بە فێڵ و بەزمێوە تازە خەریکێنێ بێزناش وەرەچەماما، بە تایبە وەرەچەموو زاڕۆڵەکاما کە ئینە دەرد٘ێوە گەورێ و گرانەنە و وەر وەرە پرۆسەو مەرگوو زوانی دەس پەنە کەرو!!
    جا ئیسە تەگبیر چێشا؟ ئێمە تەنیا دوێ ڕێما ئینێ وەرەنە: مەرگ، ژیوای.
    مەرگ واتێوە سامناکەنە و کەس مەلۆ پێوایشۆ. چێگەنە یا مشۆم حیزانە گیان بسپارمێ یا ڕاو پیرە “داڵەکەو پووشکینی” گێرمێنە وەر.
    داڵ دوێ وارگێ ژیوایش هەنێ. ئاد٘ دما ڕوەکاو پاپلەو ئەوەڵوو ژیوایشەنە پەیش بەرگنۆ کە هەڵمەتە تێژەکێ جارانیش نەمەنێنە و ئەگەر پی پا بلۆ وەرۆ ئاورایێ و بێ سەربەرزی مرۆ. پەوچی ڕێوە سخڵەتە گێرۆنە وەر. ئاد٘ ملۆوە دلێ هێلیانەکێ وێش، بە دەند٘ووکە نیمە سوویاکەیش گرد٘وو پەل و پۆ شاباڵەکاش بەرکێشۆ، شۆنەو ئانەیرە ئند٘ە چنگەڕێکێ کەرۆ تا چنگە تێژەکێ ئەوسایش و قرژۆڵەکێ ئیسەیش گنا، دمائاخریچۆ ئند٘ە دەند٘ووکش ماڵۆ تاش و تەوەنیرە تا بنەنە گنۆ.
    ئیسە ئی پەرسێ مێ وەرۆ چی ئی گرد٘ ئێش و ئازارا بە دڵ و گیان مسانۆ؟ چوون گیان شیرین و ئازیزا و حەز بە مەنەی کەرۆ تا مەرد٘ەی!!
    جا شۆنە چند٘ مانگا ئاورا و تەژنەی و ئێش و ئازاریرە، وەرە وەرە پەل و پۆ و دەند٘ووک و چنگی تازە مارۆوە و ئاخرش ڕوێ شکۆداری چەمەڕا نەکریانە، هێلیانەکێشەنە ڕوو بە ئاسمان مد٘ۆ شەقەو شاباڵا و ئاسمانەکا وزۆوە چێروو زیمە و دەسەڵاتیش!!
    مامۆسا مەولەوی واتەنی “تەوەلودی دووبارە”ش دەس پەنە کەرۆوە!!
    پەی ئاد٘ی ئینە ئەوپەڕوو وێ باوڕی، سەبەرزی، دەماخ بەرزی و کەشفی دەروونین و هیچ لەزەتێ چینەی سەرتەر نیا.
    ڕاو ئێمەیچ ئی ڕا سخڵەتێنە و پەی مەنەی مەجبوورێنمێ گرد٘ سەختی و مەرارەتێوە کێشمێ و بە دڵ بسانمێ.
    بە وەشحاڵیوە تاوو واچوو و تارێخیچ نیشانەش دان، هەورامی ئاوەز و ژیریش بنەڕەتەنە چەنی وێش ئارد٘ەن، پەڕ بوومان (پتانسیل) و وەرەچەم وازا، ڕۆح سووک و بەرزە دەماخا، ڕۆڵەو ڕۆ تەنگانەیا، دەس و پەنجە نەخشینا، نەد٘یان شۆنەو دەسوو کەسیرە و دایم خەڵک شۆنەو دەسیشەرە دیان و …
    پەوچی پتەو دڵنیانا و تاوو واچوو ڕۆڵێ هەورامانی بە ئاوەزی بەرزی هەورامیانە کە پاڵپەشتش کەشە بەرزەکێ هەورامانینێ و بە هەوڵ و تەقەلای بێ وێنەشا ناحەزاو ئی زوانیە ناهمێد٘ێ کەرا و زوانی هەورامی یاوناوە ئا یاگێ کە چاوڵ گرد٘ کەس ئاواتەوازش بێ.
    هەر پی بۆنەوە بە ئەرکوو سەروو شانەیش مزانوو ڕۆ زوانی ئەد٘ایی کە وەراوەرا چەنی دوێ دارژیوانی مەبارەک باد٘ی واچوو بە گرد٘ واڵە و برێوە ئازیزی هەورامیم جە هەر یاگێ ئی دنیا پان و پۆڕێنە کە مژیوۆ.
    هەورامی پێسە گرد٘ ئینسانێوە کە چی گرد٘ە گۆ زمینینە مژیوۆ هەقوو ژیوایش هەن، نە زیاتەر؛ نەکا لووتەش تەقیۆ ئاسمانیوە، نە کەمتریچ، نەکا مل کەچ و لارەملوو ئێد٘ و ئەوی بۆ!!

    ژیوایە وەش و پەڕ جە سڵامەتیم ئاواتا.

  3. کوسالان

    رۆ جەهانی زوانی ئەۮایی

    وەشەسیایا و ئازیزەکا !
    بە پاو دەسوروو سازمانوو جەهانی یۆنوسکۆی گەورەتەرین دەم ودەزگاو فەرهەنگی دنیاو ئارۆی : کەسێ کە نەتاوۆ بەزوانی ئەۮاییش وەنۆوە و بنویسۆ بێ سەواۮ و هیچ نەزانا کۆمەڵ شناسێ ( جامێعە شناسێ ) دنیەی باوەڕشا ئانەن : زوانی ئەۮایی چەنی شۆتی ملۆنە لاشەو چەنی مەردەی مزیۆرە ، سەپنای (تحمیل ) زوانیۆ تەری ملوو زاڕۆڵەیوەرە کە تازە کەوتە بۆ گڕ و گاڵ جەنایەت و تاوانا
    میلان کۆندرا نویسننۮەو شۆرەتی دنیەی
    ماچۆ : ئەوەڵین هەنگامە پەی فۆتنای ملەتێوە سڕیەی و پاک کەردەیۆ زەێنوو ئاملەتینە ، مشیۆ کتێبێش ، فەرهەنگش ، زوانیش فۆتنی جا دلێنە مشۆ

    زاڕۆڵە جە پەنج ساڵوو ئەوەڵوو ژیوایشەنە هەشتا جە سەۮوو زانائیێوە کە جە تەماموو عەمریشەنە مشیۆ فێربۆ یانەنە بە دەسش مارۆ هەر کەسێ بۆ باییسوو فۆتیای زوانی ئەۮایی هەر چن بەنامێ دۆس یا کەس وکاریچ بۆ هەر دژمەن و نەزان کارا ، بە فرمایشوو زانەێوە دڵسۆز و گەورەی

    چ فەرقێ کەرۆ ، پەی داگیر کریای
    پەی چێرچەپۆکەی ، سەروماڵ بریای
    ئیلا یا ئەولا ، ئی نام یا ئەو نام
    دژمەن زانا وژیر ، یاگێل و نەفام
    پەی قولەپەیوە ، گیروۮەی گازەن
    چ فەرقێ کەرۆ ، بۆرە یا بازەن ؟

    رۆ جەهانی زوانی ئەوەڵی یا ئەدایی جە تەماموو زواندارا دنیەی مەبارەک بۆ

    پەی وێچما کەڕەتێوەتەر عەرز کەروو :

    شاهۆ وکۆساڵان ، گۆششا چەنە بۆ
    کۆڕە مریەمیچ ، حەتمش وەنە بۆ
    هەر هەورامیێ ، لادۆ جە زوانیش
    مەردەو مەزارین ، هەر چن مەنەبۆ

شما هم می توانید دیدگاه خود را ثبت کنید

کامل کردن گزینه های ستاره دار (*) الزامی است -
آدرس پست الکترونیکی شما محفوظ بوده و نمایش داده نخواهد شد -

پایگاه خبری ،تحلیلی سلام پاوه |